Muling pinagtibay ng SM City Lucena ang kanilang pangako sa pagiging isang tunay na “Mall for All” sa pamamagitan ng pagsasagawa ng “Beyond Barriers” Sensitivity Training, isang programa na naglalayong palalimin ang kamalayan at pag-unawa ng mga frontliner at tenant partners sa pagbibigay ng mas inklusibo at makataong serbisyo sa lahat ng mamimili.
Pinagsama-sama ng naturang pagsasanay ang mga frontliner at tenant partners ng mall upang magkaroon ng mas malalim na pag-unawa sa iba’t ibang karanasan at pananaw ng mga customer, kabilang ang mga persons with disabilities (PWDs) at iba pang sektor na nangangailangan ng mas maingat at sensitibong pagtrato.
Layunin nitong makapagbigay ng mga praktikal na kaalaman at kasanayan upang makalikha ng ligtas, maginhawa, at mas welcoming na kapaligiran para sa lahat.
Ayon sa SM, mahalagang bahagi ng pagbibigay ng mahusay na customer experience ang patuloy na pag-aaral, pakikinig, at pagmamalasakit. Sa pamamagitan ng mga sensitivity training, mas napaghahandaan ng mga frontliner ang tamang pagtugon sa pangangailangan ng bawat customer anuman ang kanilang kalagayan o kakayahan. Ang ganitong mga programa ay bahagi ng mas malawak na adbokasiya ng SM Cares at SM Supermalls sa pagsusulong ng accessibility, inclusivity, at pantay na pagtrato sa lahat.
Sa pamamagitan ng “Beyond Barriers,” patuloy na isinusulong ng SM City Lucena ang kultura ng paggalang, pag-unawa, at malasakit—patunay na ang isang tunay na inklusibong komunidad ay nagsisimula sa kahandaang matuto at makinig upang makapaghatid ng mas magandang karanasan para sa bawat mamimili, araw-araw.