Nakibahagi ang mga siklista at SM City Lucena sa makakalikasang transportasyon sa ginanap na Pedal Power Event bilang bahagi ng pagdiriwang ng World Bicycle Day ngayong Hunyo 6.
Ang World Bicycle Day ay taunang pandaigdigang pagdiriwang na kinikilala ang mahalagang papel ng bisikleta bilang isang simple, abot-kaya, maaasahan, at environment-friendly na paraan ng transportasyon.
Layunin din nitong hikayatin ang mas maraming mamamayan na gamitin ang pagbibisikleta bilang alternatibong paraan ng paglalakbay at pagpapanatili ng malusog na pamumuhay.
Bilang panimulang aktibidad ng pagdiriwang, nagsilbing venue ang SM City Lucena para sa Pedal Power, isang programang nagtataguyod ng sustainable mobility, aktibong pamumuhay, at pangangalaga sa kalikasan.
Ayon sa SM, naniniwala sila na ang bawat padyak ay may kakayahang lumikha ng makabuluhang pagbabago para sa tao at sa planeta.
Bahagi ang aktibidad ng mas malawak na kampanya ng SM Cares at SM Supermalls na nagsusulong ng mas ligtas at mas luntiang komunidad sa pamamagitan ng pagbibisikleta.
Sa mga nakaraang pagdiriwang ng Pedal Power sa iba’t ibang SM malls sa bansa, isinagawa rin ang mga bike rides, safety clinics, environmental activities, at iba pang programang nagpapalakas ng kamalayan sa kahalagahan ng sustainable transportation at environmental stewardship.
Patuloy namang hinihikayat ng pamunuan ng SM ang publiko na suportahan ang mga inisyatibong nagtataguyod ng mas malinis na kapaligiran at mas malusog na pamumuhay, sa paniniwalang ang simpleng paggamit ng bisikleta ay maaaring maging daan tungo sa mas ligtas, mas berde, at mas napapanatiling kinabukasan.
