Naging sentro ng pagkamalikhain ang bayan ng Sampaloc sa idinaos na ARKOntest bilang isa sa mga tampok na aktibidad ng 15th Bulihan Festival ngayong Huwebes, Abril 23.
Ipinamalas ng iba’t ibang barangay at mga kalahok ang kanilang husay sa pagdidisenyo ng makukulay at malikhaing mga arko na yari sa buli, na sumisimbolo sa mayamang kultura at pangunahing industriya ng bayan.
Ang mga arko ay itinayo sa mga pangunahing lansangan at nagsilbing makukulay na dekorasyon na lalong nagbigay-buhay sa pagdiriwang.
Ayon sa pamahalaang bayan, ang ARKOntest ay bahagi ng taunang selebrasyon ng Bulihan Festival na naglalayong itampok ang mga produktong mula sa buli at ang talento ng mga residente ng Sampaloc. Kasama ito sa hanay ng mga pangunahing aktibidad ng pista ngayong taon.
Dinagsa ng mga residente at bisita ang bayan upang masaksihan ang makukulay na disenyo ng mga arko, kung saan makikita ang iba’t ibang konsepto na nagpapakita ng pagkakaisa, tradisyon, at identidad ng bawat komunidad.
Hindi lamang paligsahan ang ARKOntest, kundi isa rin itong paraan upang maipagmalaki ng mga Sampalukin ang kanilang kultura at ang kahalagahan ng buli sa kanilang kabuhayan.
Ang Bulihan Festival ay kilala bilang isa sa mga pangunahing kapistahan sa bayan tuwing buwan ng Abril.
