Mas pinalalakas pa ng Pamahalaang Panlalawigan ng Quezon ang laban kontra cancer matapos personal na magsagawa ng benchmarking visit si Governor Doktora Helen Tan sa Cancer Care Center ng East Avenue Medical Center (EAMC) nitong Biyernes, Hulyo 31, bilang bahagi ng paghahanda sa mas komprehensibo at makabagong serbisyong pangkalusugan para sa mga Quezonian.
Ang hakbang ay naglalayong mapalawak ang access ng mga pasyente sa de-kalidad na pagsusuri, paggamot, at pangangalaga laban sa isa sa mga pangunahing sanhi ng pagkamatay sa bansa.
Kasama ni Governor Tan sa pagbisita sina Provincial Health Officer II Dr. Kristin Mae-Jean Villaseñor at Engr. Marichelle Ferrer upang personal na suriin ang mga pasilidad, makabagong kagamitan, at mga serbisyong iniaalok ng EAMC para sa mga pasyenteng may cancer.
Sa isinagawang inspeksyon, tiningnan ng delegasyon ang mga pasilidad ng Cancer Care Center at ang mga sistemang ginagamit ng ospital sa pagbibigay ng komprehensibong cancer care, kabilang ang diagnosis, chemotherapy, at iba pang espesyalistang serbisyong medikal.
Kilala ang East Avenue Medical Center bilang isa sa mga pangunahing pampublikong referral hospital ng Department of Health na may espesyal na mga programa para sa pangangalaga ng mga pasyenteng may kanser.
Ayon sa Pamahalaang Panlalawigan, bahagi ang pagbisitang ito ng patuloy na pagsisikap na makabuo ng mas mahusay na mga programa at inisyatiba na magpapalawak sa access ng mga mamamayan sa de-kalidad, makabago, at komprehensibong serbisyong pangkalusugan.
Hangad ng pamahalaan na maisulong ang mga programang magbibigay ng mas mabilis, episyente, at angkop na gamutan para sa mga pasyenteng may cancer sa Quezon. Inaasahan ding magsisilbing batayan ang mga pinakamahusay na praktis ng EAMC sa pagpapalakas ng mga serbisyong pangkalusugan sa lalawigan upang mabawasan ang pangangailangang bumiyahe pa ng malayo ang mga pasyenteng nangangailangan ng espesyal na paggamot.
Patuloy namang binibigyang-diin ni Governor Tan ang kahalagahan ng pagdadala ng mga makabagong serbisyong medikal sa lalawigan bilang bahagi ng layunin ng kanyang administrasyon na mailapit ang de-kalidad na serbisyong pangkalusugan sa bawat Quezonian.