Naaresto ang isang 31-anyos na lalaki matapos mabawi ng pulisya ang isang Toyota Vios na umano’y tinangay matapos rentahan sa Olongapo City, sa National Road, Barangay Ikirin, Pagbilao, Quezon noong Agosto 3.
Kinilala ang suspek na si alyas Jayson, residente ng Subic, Zambales, habang ang may-ari ng sasakyan ay si alyas Jonel ng Olongapo City.
Ayon sa pulisya, nirentahan umano ni Solano ang sasakyan noong Hulyo 31 ngunit hindi na ito ibinalik at hindi na rin makontak. Sa tulong ng GPS tracker, natunton ang sasakyan sa Pagbilao.
Sa pagtugis, bumangga umano ang sasakyan sa isang konkretong poste at tumakas ang suspek, ngunit kalaunan ay naaresto sa Barangay Ikirin.
Ayon kay PMAJ Arjon Oxina, hepe ng Pagbilao MPS, ituturn-over ang suspek at nabawing sasakyan sa Olongapo City Police Office para sa pagpapatuloy ng imbestigasyon at kaukulang pagsasampa ng kaso.
Napag-alaman ding may iba pa umanong kaso ng carnapping na kinakaharap ang suspek.