Itinampok ang pagkakaisa, kaalaman at pagbubukas ng mga bagong oportunidad para sa mga magniniyog sa isinagawang 2026 Quezon Coconut Farmers Summit noong Agosto 18 sa Quezon Convention Center, Lucena City.
Layunin ng summit na bigyang-pansin ang kalagayan at pangangailangan ng mga coconut farmers sa lalawigan, gayundin ang mga oportunidad na maaaring magpalakas sa kanilang kabuhayan at makapagpaunlad sa industriya ng niyog sa Quezon.
Tampok sa programa ang iba’t ibang kompetisyon at showcase na nagbigay-diin sa potensyal ng coconut industry, kabilang ang Coconut Product Display, Coconut Model Farm, Vlog on Coconut Farming System, Agritourism Farm, at Agritourism Farm Promotion na umakit sa mga dumalo at bumisita sa programa.
Nagkaroon din ng serye ng pagbabahagi ng kaalaman mula sa mga eksperto at kinatawan ng iba’t ibang ahensya at institusyon.
Tinalakay ni Atty. Joycel R. Panlilio, Assistant Secretary for High Value Crops, Sagip Saka, and Intellectual Property, ang Geographical Indication for Quezon Lambanog; habang ibinahagi ni Dr. Dexter R. Buted, Administrator ng Philippine Coconut Authority (PCA), ang mga hakbang para sa “Strengthening the Quezon Coconut Industry Through Agritourism and Value-Added Enterprises.”
Samantala, tinalakay ni Marites T. Castro, Regional Director ng Department of Tourism IV-A, ang “Transforming Farms into Sustainable Agritourism Destinations: Driving Rural Development, Farm Entrepreneurship, and Tourism Excellence.”
Ibinahagi naman ni Bibiano C. Concibido Jr., Regional Manager III ng PCA, ang mga accomplishment ng Coconut Farmers and Industry Development Plan (CFIDP), partikular sa medical benefits at educational support para sa mga coconut farmers.
Nagbigay rin ng kaalaman sina Judit Alday-Mangmang, Professional Food Technologist at Chapter President, hinggil sa “Transforming Coconut Farming Into Competitive Enterprise,” at Marisa P. Eslao-Pamo, Assistant Professor ng UP Diliman–AIT, tungkol sa “Building an Exceptional Agritourism Farm Based on Standards, Experiences and Best Practices.”
Dinaluhan din ang programa ni Governor Doktora Helen Tan, kasama ang mga miyembro ng Sangguniang Panlalawigan, bilang pagpapakita ng suporta sa mga coconut farmers at pagpapalakas ng ugnayan sa pagitan ng mga magsasaka, katuwang na ahensya at iba pang stakeholders.
Binigyang-diin sa pagtitipon na sa pamamagitan ng pagbubukas ng mga bagong oportunidad, pagpapalawak ng kaalaman at pagpapatibay ng pagtutulungan, mas mapapalakas ang kabuhayan ng mga magniniyog at ang kabuuang coconut industry ng lalawigan.
Sa
sama-samang pagkilos ng mga magsasaka, pamahalaan, pribadong sektor at mga
katuwang na institusyon, patuloy na isinusulong ang isang mas masigla, matatag
at maunlad na industriya ng niyog sa Quezon.