Planong itayo ng Atimonan Windkraft Corp. (AWC) ang isang ₱10 bilyong wind power project sa bayan ng Atimonan na inaasahang makapagbibigay ng hanggang 100 megawatts (MW) na kuryente bilang bahagi ng pagpapalakas ng renewable energy sa bansa.
Ang AWC ay isang joint venture ng Triconti Windkraft Group at Levanta Renewables, na kapwa aktibo sa pagpapaunlad ng malinis na pinagkukunan ng enerhiya sa Asya.
Batay sa mga dokumentong inihain sa Department of Environment and Natural Resources, sasaklaw ang proyekto sa humigit-kumulang 1,539 ektarya sa pitong barangay: Balugohin, Sokol, Rizal, Caridad Ibaba, Caridad Ilaya, Villa Ilaya, at Villa Ibaba.
Plano ng kumpanya na magtayo ng 13 wind turbine generators na may kapasidad na 8 MW bawat isa.
Ayon sa AWC, mas pinipili nila ang mas mataas na kapasidad na turbine upang mapataas ang produksyon ng kuryente habang nababawasan ang bilang ng itatayong istruktura, isang hakbang na makatutulong sa mas episyenteng paggamit ng lupa at pagbawas sa posibleng epekto sa kalikasan, kabilang ang habitat fragmentation.
Layunin ng proyekto na magsuplay ng kuryente sa mga kabahayan, negosyo, at industriyal na sektor, kasabay ng pagsuporta sa pangkalahatang layunin ng bansa na lumipat sa mas malinis at sustainable na pinagkukunan ng enerhiya.
Ayon pa sa kumpanya, ang proyekto ay nakaayon sa Philippine Energy Plan at sa mas malawak na stratehiya ng pambansang kaunlaran, partikular sa pagpapalawak ng renewable energy mix ng bansa upang mabawasan ang pagdepende sa fossil fuels.
Una nang nagkaloob ang Department of Energy ng 25-taong Wind Energy Service Contract (WESC) sa Triconti ECC Renewables Corp noong Disyembre 23, 2019, na kalaunan ay inilipat sa AWC noong Setyembre 11, 2023.
Tinatayang makalilikha ang proyekto ng humigit-kumulang 200 trabaho sa panahon ng konstruksyon, habang nasa 50 hanggang 100 naman ang kakailanganin sa operasyon.
Target ng AWC na simulan ang konstruksyon sa unang bahagi ng 2027 at tuluyang maging operational ang proyekto sa unang quarter ng 2029, na inaasahang mag-aambag sa mas matatag at malinis na suplay ng kuryente sa rehiyon at sa buong bansa