Nagsagawa ng pagpupulong ang Toll Regulatory Board (TRB) kasama ang mga punong bayan ng ilang bayan sa Quezon bilang bahagi ng paghahanda para sa malaking proyektong South Luzon Expressway Toll Road 5 (SLEX TR-5).
Kabilang sa mga lugar na saklaw ng unang bahagi ng proyekto ang Lucena City, Pagbilao, Padre Burgos, Unisan, Gumaca, Agdangan, at Sariaya, na inaasahang madaraanan ng expressway.
Sa isinagawang konsultasyon, pinakinggan ang mga mungkahi at rekomendasyon ng mga lokal na opisyal upang matiyak na magiging kapaki-pakinabang ang proyekto sa mga residente at motorista.
Ayon sa TRB, ang Segment 1 ng SLEX TR-5 ay magsisimula sa Brgy. Mayao, Lucena City at magtatapos sa Gumaca, Quezon, na may habang humigit-kumulang 61 kilometro. Magkakaroon ito ng apat na pangunahing interchanges kabilang ang Pagbilao, Atimonan, Agdangan, at Gumaca.
Layunin ng proyekto na magbigay ng mas mabilis, ligtas, at maaasahang alternatibong ruta para sa mga biyahero patungong Bicol Region, kasabay ng inaasahang pagbawas sa trapiko sa Maharlika Highway at iba pang pangunahing lansangan sa Quezon.
Sa kabuuan, ang SLEX TR-5 ay planong umabot sa 420 kilometro mula Lucena hanggang Matnog, Sorsogon, na inaasahang magiging isa sa pinakamahabang expressway sa bansa kapag natapos.
Ipinahayag ng mga lokal na opisyal ang kanilang suporta sa proyekto, lalo na sa potensyal nitong mapabilis ang paglalakbay, mapalakas ang turismo, at higit na mapaunlad ang ekonomiya ng mga bayan sa Quezon at buong Bicol Region.
Photos courtesy of the Provincial Government of Quezon