Nakiisa si Governor Doktora Helen Tan sa isang mahalagang pagpupulong kasama ang mga opisyal mula sa Department of the Interior and Local Government (DILG), Department of Education (DepEd), Department of Agriculture (DA), at Department of Budget and Management (DBM) noong Mayo 13, upang talakayin ang mga programang magpapalawak pa sa paghahatid ng serbisyo publiko sa mga komunidad at lokal na pamahalaan sa bansa.
Sa naturang pagpupulong, tinalakay ang iba’t ibang proyekto at inisyatiba na nakatuon sa pagpapabuti ng edukasyon, agrikultura, pamamahalang lokal, at paglalaan ng pondo para sa mahahalagang serbisyo ng pamahalaan.
Kabilang sa mga binibigyang prayoridad ng nasyonal na pamahalaan ngayong taon ang pagpapalakas ng school infrastructure, dagdag na suporta sa mga mag-aaral at guro, at mas episyenteng paggamit ng pondo para sa mga lokal na programa.
Ayon kay Governor Tan, mahalaga ang tuloy-tuloy na koordinasyon sa pagitan ng nasyonal at lokal na pamahalaan upang masigurong naaabot ng mga programa ang tunay na pangangailangan ng mamamayan, lalo na sa mga lalawigan at komunidad sa labas ng mga urban center.
Layunin din ng nasabing pagpupulong na higit pang pagtibayin ang ugnayan ng mga ahensya ng gobyerno at mga lokal na pamahalaan upang makapaglatag ng mga polisiyang mas inklusibo, episyente, at direktang makatutugon sa pang-araw-araw na hamon ng iba’t ibang sektor ng lipunan.
Matatandaang aktibo rin ang pamahalaang panlalawigan ng Quezon sa pakikipag-ugnayan sa mga national agencies para sa mga programang pangkaunlaran sa lalawigan.
Photos courtesy of the Provincial Government of Quezon
