Nagkaloob ang pamahalaang panlungsod ng Lucena ng iba’t ibang agricultural inputs sa mga magsasaka at mangingisda bilang bahagi ng pagdiriwang ng National Farmers’ and Fisherfolk’s Month na ginanap sa Lucena Convention Center-Atrium kahapon, Mayo 11.
Aabot sa 635 na mga magsasaka at mangingisda mula sa iba’t ibang samahan sa lungsod ang tumanggap ng tulong na kinabibilangan ng vegetable seeds and seedlings, organic fertilizers, soil conditioner, bio-fertilizers, agricultural salt, foliar fungicide, shadenet, plastic mulch, knapsack sprayer, wheelbarrow, hand tractor, pole pruning saw, at iba pang garden tools.
Bukod sa mga agricultural inputs at kagamitan, ipinagkaloob din sa mga benepisyaryo ang Accident and Dismemberment Security Scheme Certificate bilang karagdagang proteksyon at suporta para sa kanilang kabuhayan.
Pinangunahan ni Mayor Mark Alcala ang distribusyon katuwang si Office of the City Agriculture OIC Jirah Lou Merano. Nakiisa rin sa aktibidad sina Konsehal Patrick Norman Nadera bilang Committee Chair ng Agriculture sa Sangguniang Panlungsod ng Lucena, Agricultural Program Coordinator Oliver Sarmiento ng Department of Agriculture (DA), Acting Senior Agriculturist Wendelyn Oliveros ng Philippine Coconut Authority (PCA) at Aquacultural Technologist Ledy Dumanggas ng Bureau of Fisheries and Aquatic Resources (BFAR).
Ayon sa lokal na pamahalaan, layunin ng programa na mapalakas ang produksyon at kabuhayan ng mga magsasaka at mangingisda sa lungsod sa pamamagitan ng pagbibigay ng sapat na suporta at makabagong kagamitan para sa agrikultura at pangingisda.
Photos courtesy of Ronald Lim
