Matapos ang mahigit isang siglo, muling nasilayan sa Infanta, Quezon ang mga makasaysayang espada na sinasabing pag-aari ni Col. Pablo Astilla, lider ng mga Katipunero sa Distrito de la Infanta at kinilalang una’t huling gobernador ng dating Probinsya ng Infanta noong panahon ng Revolutionary Government at Unang Republika ng Pilipinas.
Ayon kay Infanta Mayor L.A. Ruanto, matinding emosyon ang kanyang naramdaman nang personal niyang mahawakan ang mga espada, na itinuturing niyang mahalagang bahagi ng kasaysayan ng mga Infantahin at ng pakikibaka para sa kalayaan.
Nang matagpuan ang mga espada, muling nabigyang-buhay ang panawagan ng alkalde noong Hulyo 20, 2026 para sa paghahanap sa makasaysayang sandata ni Col. Astilla, kasabay ng muling pagdiriwang ng Kalayaan ng Infanta matapos ang mahigit 80 taon.
Nagpasalamat si Ruanto sa pamilya Miras, kabilang ang mga apo sa tuhod ni Col. Astilla, sa pangangalaga at pagbabahagi ng mga makasaysayang kagamitan ng kanilang pamilya.
Ayon pa sa alkalde, hindi lamang ang pamilya Astilla ang may mahalagang papel sa kasaysayan ng Infanta. Kabilang din sa mga pamilyang may kaugnayan sa kanilang lahi ang Huertazuela, Mercado, Nakar, Peñaverde, Mortiz, Peñamante at Villaflor.
Plano rin ng lokal na pamahalaan na gawing museo ang kasalukuyang munisipyo matapos ang paglipat sa bagong gusali ng pamahalaang bayan, upang mapangalagaan at maipakita sa publiko ang mga makasaysayang kagamitan at kuwento ng kabayanihan ng mga Infantahin.
Nakikipagtulungan naman ang lokal na pamahalaan sa mga historian, researcher, curator at mga institusyon upang higit pang saliksikin ang kasaysayan ng Infanta, kabilang ang mga Katipunerong sina Rafael Rutaquio at Rufino Ortiz.
Hinikayat ni Ruanto ang mga residente na may hawak na lumang kagamitan, dokumento o kuwento tungkol sa kasaysayan ng Infanta na makipag-ugnayan sa Infanta Culture, Heritage, Arts and Tourism Section upang makatulong sa pagtatatag ng museo at sa patuloy na pangangalaga sa kasaysayan ng bayan.