Pormal na lumagda sa isang Memorandum of Agreement (MOA) ang Pamahalaang Panlalawigan ng Quezon at Golden Arches Development Corporation, katuwang ang Provincial Public Employment Service Office (PESO) at Department of Labor and Employment (DOLE), upang palawakin ang oportunidad sa trabaho para sa mga senior citizen sa lalawigan.
Isinagawa ang ceremonial signing kamakailan sa 3rd Floor ng Quezon Provincial Capitol sa Lungsod ng Lucena na pinangunahan nina Governor Doktora Helen Tan at Maria Margarita Torres, Managing Director ng Golden Arches Development Corporation.
Layunin ng kasunduan na mabigyan ng mas maraming pagkakataon sa hanapbuhay ang mga nakatatandang mamamayan na may kakayahan at nagnanais pang magtrabaho. Alinsunod ito sa Republic Act No. 9994 o Expanded Senior Citizens Act of 2010, na nagtatakda na ang mga senior citizen ay dapat mabigyan ng sapat na impormasyon at job matching services upang manatili silang produktibong bahagi ng lipunan.
Dinaluhan din ng seremonya sina Provincial Administrator Manuel M. Butardo, Golden Arches Development Corporation Vice President for Human Capital Group Ruben Marasigan, Global Ventures Food Industries Inc. Owner-Operator Alan O. Rañola, Provincial Federation of Senior Citizens Vice President Archimedes Alan, DOLE Region IV-A Regional Director Atty. Erwin N. Aquino, mga alkalde ng mga lokal na pamahalaan na may sangay ng McDonald’s, at iba pang kinatawan ng Golden Arches Development Corporation.
Sa pamamagitan ng kasunduang ito, inaasahang mas mapapalawak ang access ng mga senior citizen sa mga angkop na oportunidad sa trabaho, kasabay ng patuloy na pagsusulong ng Pamahalaang Panlalawigan ng Quezon ng mga programang nagtataguyod ng pantay na oportunidad at mas mataas na kalidad ng pamumuhay para sa bawat Quezonian.