Hiniling ni Quezon Governor Angelina “Doktora Helen” Tan sa Hiraya Water Corporation ang malinaw at konkretong plano upang matugunan ang problema sa suplay ng tubig sa Lucena, Tayabas, Pagbilao, Mauban at Atimonan.
Sa pulong noong Agosto 3, nakipag-usap si Governor Tan kay Hiraya Water owner Lucio Co upang alamin ang mga hakbang ng kompanya para mapabuti ang serbisyo ng tubig sa mga lugar na sakop nito.
Hiniling ng gobernador kay Co na makipag-ugnayan sa Quezon Metropolitan Water District (QMWD) at sa mga Local Chief Executive (LCE) ng mga apektadong lugar upang maipresenta ang kanilang immediate, medium-term at long-term plans tungo sa pagkakaroon ng 24/7 na suplay ng tubig.
“Makakaasa po kayo, matutukan ko ito personally at i-monitor ang kanilang mga aksyon na gagawin,” saad ni Governor Tan.
Samantala, tiniyak ng Hiraya Water ang commitment nitong ayusin at pagbutihin ang serbisyo ng tubig.
Ang pulong ay bahagi ng pagtutulungan ng pamahalaang panlalawigan, mga lokal na pamahalaan at water service provider upang matiyak ang mas maaasahan at tuluy-tuloy na suplay ng tubig para sa mga residente.
Kamakailan lamang, inilunsad ng Hiraya Water ang 14 waterworks infrastructure projects sa Lucena na nagkakahalaga ng P500 milyon, na nakatuon sa pagpapalawak at pagpapahaba ng oras ng water availability, na target na umabot sa 24 oras kada araw.