Makulay at makabuluhang ipinagdiwang noong Abril 25 ang ika-6 na taon ng Hayin Festival kasabay ng ika-417 anibersaryo ng pagkakatatag ng bayan ng Infanta.
Bilang pag-alala at pasasalamat sa masaganang ani at mga biyayang hatid ng kalikasan, nagtipon-tipon ang mga mamamayan, magsasaka, at mga bisita upang makiisa sa selebrasyong puno ng saya, tradisyon, at pagkakaisa.
Ang petsa ng pagdiriwang ay itinakda rin bilang special non-working day sa bayan sa bisa ng Proclamation No. 1210 upang mabigyang pagkakataon ang mga residente na ganap na makilahok sa pagdiriwang.
Tampok sa pagdiriwang ang makukulay na parada, masisiglang sayaw, at iba’t ibang aktibidad na sumasalamin sa mayamang pagkakakilanlan ng bayan. Sa bawat indak ng mga mananayaw at himig ng tugtugin, malinaw na naipapakita ang taos-pusong pasasalamat ng mga Infantahin para sa biyayang natatanggap at ang matibay na samahan ng kanilang komunidad.
Hindi lamang masasarap na pagkain at mga lokal na handog ang inihain sa festival, kundi maging ang mayamang kulturang minana at patuloy na ipinagmamalaki ng bayan. Sa bawat putahe, musika, at ngiti ng mamamayan, nasasalamin ang makulay na tradisyon at pagkakaisang tunay na yaman ng Infanta.
Ayon sa lokal na pamahalaan, bahagi ng pagdiriwang ang iba’t ibang programang pangkultura at pampalakasan bilang selebrasyon ng 417th Founding Anniversary ng bayan. Kabilang dito ang mga paligsahan at iba pang community activities na layong higit pang pagtibayin ang pagkakabuklod ng mga residente.
Hindi pa rito nagtatapos ang kasiyahan sapagkat tuloy-tuloy pa ang selebrasyon ng Hayin Festival hanggang Abril 29, kung saan inaasahan pa ang mas marami pang makukulay na programa, masasarap na handog, at masasayang sandaling magbubuklod sa buong bayan ng Infanta.
