Nakatanggap ng libreng sapatos ang may kabuuang 18,600 junior at senior high school students mula sa iba’t ibang pampublikong paaralan sa Lungsod ng Lucena bilang bahagi ng programang pang-edukasyon ng Pamahalaang Panlungsod para sa pagbubukas ng klase ngayong School Year 2026–2027.
Isinagawa ang pamamahagi sa magkakahiwalay na paaralan kabilang ang Lucena City National High School–Ibabang Dupay, Dalahican National High School, at Cotta National High School.
Samantala, mga school bag naman ang ipinagkaloob sa mga mag-aaral ng Mayao Parada Elementary School upang makatulong sa kanilang paghahanda sa panibagong taon ng pag-aaral.
Pinangunahan ni Mayor Mark Alcala ang pamamahagi kasama sina DepEd Lucena Schools Division Superintendent Susan Oribiana, MAPEH Education Program Supervisor Joey Jader, at Budget Officer Rosie Castillo.
Ayon sa mga opisyal, layunin ng programa na mabawasan ang gastusin ng mga magulang at matiyak na may sapat na kagamitan ang mga mag-aaral sa pagsisimula ng klase.
Ang inisyatibong ito ay bahagi ng patuloy na suporta ng lokal na pamahalaan sa sektor ng edukasyon at sa kapakanan ng mga mag-aaral sa lungsod.
Katulad ng mga programang ipinatutupad ng iba’t ibang lokal na pamahalaan sa bansa, nakatutulong ang pamamahagi ng mga pangunahing pangangailangan sa paaralan upang mabigyan ng mas maayos at mas maginhawang pagpasok sa klase ang mga kabataan.
Photos Courtesy of Ronald Lim
