Patuloy na nararamdaman ng libu-libong pamilyang Quezonian ang ayuda ng Pamahalaang Nasyonal sa pamamagitan ng “Bawat Bayan Makikinabang (BBM) Rice Subsidy Program,” kung saan tumatanggap ang mga benepisyaryo ng kabuuang 40 kilo ng bigas na ipinadadala mismo sa kanilang mga barangay at maging sa kanilang mga tahanan sa pakikipagtulungan ng mga lokal na pamahalaan.
Layunin ng programa na mabigyan ng sapat na suplay ng bigas ang mga pamilyang higit na nangangailangan at makatulong sa pagpapagaan ng kanilang gastusin sa gitna ng patuloy na pagtaas ng presyo ng mga pangunahing bilihin.
Ang pamamahagi ay isinasagawa nang paunti-unti sa mga susunod na buwan upang matiyak na tuloy-tuloy ang matatanggap na suporta ng mga benepisyaryo.
Ayon sa pamahalaan, bahagi ang BBM Rice Subsidy Program ng mga hakbang ng administrasyon ni Pangulong Ferdinand “Bongbong” R. Marcos Jr. upang mapalakas ang seguridad sa pagkain at maprotektahan ang kapakanan ng mga mahihirap at vulnerable na sektor ng lipunan.
Malaki ang naging papel ng mga lokal na pamahalaan sa Quezon sa maayos na distribusyon ng bigas, kabilang ang paghahatid nito sa mga barangay at, sa ilang lugar, maging direkta sa mga tahanan ng mga kwalipikadong benepisyaryo upang maging mas mabilis at mas maginhawa ang pagtanggap ng ayuda.
Samantala, nagpahayag ng taos-pusong pasasalamat ang Pamahalaang Panlalawigan ng Quezon at ang mga mamamayang Quezonian kay Pangulong Marcos sa patuloy na pagpapatupad ng programang nagbibigay ng mahalagang suporta sa mga pamilyang nangangailangan.
Umaasa ang pamahalaan na sa pamamagitan ng BBM Rice Subsidy Program ay higit pang mapapagaan ang pang-araw-araw na pamumuhay ng mga benepisyaryo habang patuloy na isinusulong ang mga programang naglalayong tiyakin ang sapat at abot-kayang pagkain para sa bawat pamilyang Pilipino.